Bi armanca rawestandina pêla faşîst a rastgir a ku di mehên dawî de li Elmanyayê bilind dibe, li ser banga Meclîsa Penaberan a Baden-Wurttemberg û zêdeyî 80 saziyan li Stûttgartê meş û mîtîngek hate lidarxistin.

Bi hezaran kes beşdarî meş û mîtîngê bûn û bi al, afîş û pankartan daxwazên xwe bi devkî û nivîskî anîn ziman.

Girseya ku li qada Maktplatzê ya li ber avahiya Şaredariya Mezin a Stûttgartê dest bi kombûnê kir  û kolanên derdorê tijî kes bûn. Nûnerên saziyên sivîl derketin ser dikê û axaftin kirin û li ser girîngî û sedema çalakiya îro anîn ziman. Di axaftinan de bang li raya giştî kirin ku li dijî AfD û pêkhateyên wê helwestê nîşan bidin. Axaftvanan her wiha li ser polîtîkaya heyî ya hikûmeta Elman jî nirxandin kirin.

Çapemeniya 'Lêkolîna Correctiv' civîna veşartî ya nûnerên CDU û AFD'ê yên ku di Mijdara 2023'an de li Potsdamê hatin cem hev, li ser biyanofobî û armanca wan a dersînorkirina penaberan bi hincetên veşartî ji raya giştî re ragihandibû. Piştî vê daxuyaniyê bi mehan li tevahiya Elmanyayê dengên dijber bilind bûn û çalakiyên ku ev helwest nayê qebûlkirin dest pê kir. Di çalakiya hevpar a 24’ê Sibatê ya li Stûttgartê pêk hat de hevdîtinên veşartî yên her du partiyan û biryarên wan şermezar kirin. Di çalakiyê de ji bo pêşî li zîhniyeta nîjadperest a AfD'ê bê girtin, bal hat kişandin ser girîngiya çareserkirina pirsgirêkan.

Di daxuyaniya hevpar a nûnerên Seebrûcke BW û Rêxistina Efûyê ya Navneteweyî Fluchtlignsrat Baden-Wurtemberg de kesên ku di encama şer û polîtîkayên îdeolojiyên faşîst de jiyana xwe ji dest dane, hatin bibîranîn. Di daxuyaniyê de ev tişt hatin gotin: “Em kesên ku li Behra Spî ji bo azadiya xwe canê xwe feda kirine bi bîr tînin. Em şehîdên ku ji aliyê rejîmên kujer ve hatine qetilkirin û darvekirin bi bîr tînin! Em kesên ku di têkoşîna Tevgera Jinên Kurd û Tevgera Jin Jiyan Azadî de şehîd bûne bi bîr tînin. Em kesên ku li her derê cîhanê li dijî faşîzmê dengê xwe bilind dikin û li dijî faşîzmê têdikoşin û yên ku wê têkoşîna xwe bidomînin jî ji bîr nakin! Em qurbaniyên şer û terorê li Sûriye, Efganistan, Sûdan, Ukrayna, Somalî û herêmên din ên şer ji bîr nakin! Her wiha em kesên ku ji ber têkoşîna mafên mirovan di girtîgehan de ne ji bîr nakin! Û yên ku ji bilî revînê yan jî penaberiyê çareya wan nemabûn û ji ber vê sedemê jiyana xwe ji dest dan!

Em ji we dipirsin; Ger hûn bûna mirovên ku ji bo sax bimînin ji bilî revîn û penaberiyê neçar mabûn we çi bikira? Mixabin ew kes ji bo sax bimînin û bûne penaber… Lê em hene, li dijî faşîzmê ne û ne bi tenê ne! Di van salên dawî de, siyaseta Elmanyayê ya penaberan gihîştiye rewşek tirsnak û xemgîn. Bûye rewşeke ku mirovahî îflas bike. Li şûna afirandina cihên ewle, têne asteng kirin û krîmînalîzekirin. Pêla dijminatiya biyaniyan gihîştiye lûtkeyê. Ji bîr kirin ku mafê penaberiyê mafekî mirovî ye. Û em naxwazin li hemberî vê pêlê bêdeng bimînin. Em li cem kesên ku ji bo jiyana mirovên din şer dikin in. Em daxwaza rêzgirtin û parastina mafê penaberan dikin.

Divê Ewropa rêyên ewletir ji penaberan re veke. Ji sala 2019’an û vir ve zêdeyî 10 hezar kes dema ku reviyane mirine. Yên derqanûnî ne penaber, îdeolojiyên nijadperest ên AfD û alîgirên wê ne. Di serê salê de Parlamentoya Elmanyayê "Qanûna başkirina dersînorkirinê” qebûl kir û li şûna başkirina rewşê xwest ku alîgirên dersînorkirinû ji xwe re çêbikin. Ev qanûn demokrasî û mafên me yên bingehîn binpê dike. Ji ber vê yekê em bi hev re ji bo heman maf û rûmeta her mirovî têbikoşin. Ji ber ku rûmeta mirovan nayê binpêkirin. Tu kes ji yê din kêmtir bi qîmetir nîne. Ji ku derê tê bila bê; bi kîjan zimanî biaxive; baweriya mirov çi dibe bila bibe, em ê nehêlin ku me parçe bikin! Bi hemû hêza xwe em ê di têkoşîna li dijî AfD’ê de bi ser bikevin.

Xwîna ku di hemû damarên me de diherike yek e. Wekî ku Margot Friedlander got, "Xwîna Xiristiyan, Cihû û Misilman tune. Tenê xwîna mirovan heye. Ji ber vê yekê divê em hemû hurmetê ji mirovan re bigirin!'' Em ​​bi dengekî bilind bibêjin ku li vî welatê ku em hemû bi hev re dijîn penaberan baş pêşwazî bikin û em dixwazin bi hev re bijîn. Werin em wisa bi dengekî bilind bibêjin ku ne tenê kesên li şaredariyê, bila Parlamentoya Elmanyayê jî bibihîzin û bi dengekî bilind, zelal bibêjin: Penaber bi xêr hatin vir!

Piştî axaftinan girse heta Tûbîngen Strasse bi dirûşmeyan meşiya û heta qada Marîenplatzê hat. Li vir jî bi hezaran çalakgerên ku nekarîn xwe li qada mîtîngê bi cih bikin, piştî axaftin û berzkirina dirûşmeyan dawî li çalakiya xwe anîn.