Çalakiya 'Nobeda ji bo azadiya Ocalan' ku 25'ê Hezîrana 2012'an li ber Konseya Ewropayê ya li bajarê Strasboûrg ê Fransayê dest pê kir, mîna her hefteyê bi komeke nû dewam dike. Nobedarên vê hefteyê 4 kesên ji bajarê Dûîsbûrgê yê Elmanyayê ne.

Bi navê Meclîsa Gel a Dûîsbûrgê Berîvan Talay, Kahraman Çelîkçel, Mûstafa Tûzak û Oktay Akaslan ji roja Yekşemê ve nobedê digirin.

Berîvan Talay bi navê komê axivî û bi bîr xist, Rêberê Gelê Kurd Abdullah Ocalan ku 20 sal in di nava şert û mercên tecrîdê de dîl tê girtin, 3 salên dawî bi dijwarî hatiye tecrîdkirin. Talay diyar kir, Ewropa û saziyên wê ku îdîa dikin 'navenda mafên mirovan' e, li pêşberî vê yekê bêdeng in û bi taybetî ragihand, Komîteya Pêşîgirtina li Êşkenceyê (CPT) erk û berpirsyariya xwe bi cih nîne.

Di daxuyaniya komê de hate ragihandin, ji ber êrîşên komkujî û dagirkeriyê yên dewleta Tirk, Kurd di pêvajoyeke zehmet de ne û bal hate kişandin ser girîngiya grevên birçîbûnê yên li girtîgehan, li Hewlêr, Galler û Strasboûrgê. Di daxuyaniyê de hate gotin, "Gelê Kurd bi derfetên xwe hemûyan û bi rûmeta xwe li ber xwe dide."

Di dewama daxuyaniyê de hate gotin, "Rêberê me timî daxwaza aştî û aramiyê dikir. Lê belê, yên li hemberî me ji ber ku ji aştî û mirovahiyê fêhm nake, serî li vê çalakiyê hatiye dayin. Ji bo Rêberê xwe, em ê hewl bidin berpirsyariya xwe bi cih bînin."

Çalakgeran ji bo mîtînga mezin a îro ya li Strasboûrgê ku wê li dijî tecrîdê bê lidarxistin, banga tevlîbûnê kirin.

Di vê navberê de, ji nobedaran Mûstafa Tûzak ji bo piştgiriyê bide greva birçîbûnê ya bêdawî û bêdorveger, ji roja Yekşemê ve di greva birçîbûnê de ye.