Endamên Komîteya Kurdan ên li bajarê Mîlanoyê çûn komeleya Assocîazîone Antîgone û derbarê tecrîda li ser Ocalan, rewşa giştî ya li girtîgehan, zextên li ser mafên mirovan û çalakiyên greva birçîbûnê agahî dan.

Nûnera saziya Komeleya Mafên Girtiyan a Lombarîayê Valerîa Verdolînî got ku “Min li endamên Komîteya Kurdan guhdarî kir û me qala dijwariya jiyana li Tirkiyeyê kir.”

Verdolînî diyar kir ku ew li hemberî şertên girtîgehan bihistyar in û got ku “Komeleya me maf û azadiya gelan diparêze. Ji ber vê jî wê gelekî girîng be ku çavdêriya şertên li girtîgehan were kirin.”

Verdolînî diyar kir ku ew ê bi kêşeyên li girtîgehên Tirkiyeyê re eleqedar bibin û heta ku ji destê wan were wê vê meseleyê bişopînin.