Di 27’ê Mijdarê de li paytextê Îngilîstanê Londrayê polîsan li dijî Navenda Civaka Kurd û aktîvîstên wê operasyonek li dar xistibû. Kurdistanî  û dostên wan ji 27’ê Mijdarê ve ye li pêşiya avahiya Navenda Civaka Kurd têdikoşin. 4 welatiyên Kurd dest bi greva birçîbûnê ya bêdawî kirin û seredanên ji bo qada têkoşînê jî berdewam dikin.

Lêpirsîna 7 Kurdên ku di encama operasyonê de hatin binçavkirin, berdewam dike. Piştî ku Nivîskar û Siyasetmedar Alî Poyraz, Hevseroka Meclîsa Gel a Kurd Tûrkan Bûdak, aktîvîstê KHM’ê Ercan Akbal, aktîvîst Berfîn k., Nûnerê Karên Derve yê Navenda Civaka Kurd Agît K. û aktîvîst Dogan S. hatin binçavkirin, greva birçûbûnê dest pê kir. Hate zanîn ku rewşa tenduristiya aktîvîstên Kurd baş e û di lêpirsînê de jî mafê xwe yê neaxaftinê bi kar anîne.  Derheqê kesên hatine binçavkirin de biryara binçavkirina 7 rojan hatibû dayîn ku wê di 4’ê Kanûnê de bi dawî bibe û nayê zanîn ku wê binçavkirina aktîvîstên Kurd were dirêjikirin yan na.

EV 35 SAL IN XIZMETÊ DIDE

Welatiya bi navê Devrîm Sara ku li pêşiya avahiya KCC’Ê  di greva birçûbûnê de ye got: ‘’Ev sazî 35 sal in xizmetê dide gelê Kurd û mazûvaniya dehhezaran Kurdan kiriye.  Nayê qebûlkirin ku Kurd bi awayekî sîstemetîk were krîmînalîzekirin û divê dawiyê li vê tundiyê bînin. Helwesta dewletan ya bi vî awayî ya li hemberî me nayê qebûlkirin. Vî gelî DAÎŞ têk bir. Lê belê dewleta Tirk piştgiriyê dide DAÎŞ’ê. Terorîzekirina vî gelî bêexlaqî ye.’’

BARIYET TEMSÎLIYETA FAŞÎZMÊ DIKIN

Welatıya bi navê Bêrîvan Yavayli ku di greva birçûbûnê de ye ev yek anîn ziman: ‘’Heman tişt li Tirkiyeyê jî li me diqewime. Ji gelê Kurd çi tê xwestin! Ez ji ber faşîzma AKP’ê hatim vî welatî. Lê belê li vir jî heman faşîzm heye. Bariyerên li pêşiya avahiya KCC’ê temsîliyeta faşîzmê dikin.’’

Her wiha di 3’yê Kanûnê saet 17.00’an de wê bi pêşengtiya DGB’ê li pêşiya Îstasyona Turnpike Lineyê mîtîng û meşeke girseyî were lidarxistin. Hate zanîn ku  ji bo bidawîbûna dagirkeriya li ser avahiya KCC’ê têkiliyên dîplomatîk yên DGB û Federasyona Elewiyan a Brîtanyayê yên li gel parlamentoyê berdewam dikin. 

ÇALAKIYA SKOÇYAYÊ

Kurdıstanî û dostên wan li bajarê Edinburg ê Skoçyayê li navenda bajêr hatin li ba hev û çalakiyeke protestoyî li dar xistin.

Di çalakiyê de gelek caran dirûşmeyên “Jin, Jiyan, Azadi” û  “Bijî Serok Apo” hatin bezkirin. Di çalakiyê de flamayên Rêber Apo û alên YPG û YPJ’ê hatin hilgirtin. 

Hevserokê Meclîsa Gel a Kurd Dersîm Amed di çalakiyê de axivî û Amed da zanîn ku êrîşa organîzekirî ya polîsên Îngilîz a li dijî gelê Kurd  ne tenê li dijî nirxên demokratîk, di heman demê de êrîşeke  li dijî mafê gelê Kurd ê birêxistinbûnê ye jî. Dersîm Amed bang li hemû gelan kir ku di 3’yê Kanûnê de beşdarî çalakiya ku wê li pêşiya Parlamentoya Skoçyayê were lidarxistin, bibin.

DAXUYANIYA ENTERNASYONALÎSTAN

Li bajarê Glasgowê enternasyonalîst hatin li ba hev û operasyona polîsên Îngilîz a li dijî gelê Kurd protesto kirin.

Daxuyanî bi Tora Piştevaniya Kurdistanê re hate dayîn û di daxuyaniyê de binçavkirina aktîvîstên Kurd hate protestokirin û ev yek hatin gotin: ‘’Em dixwazin binçavkirina aktîvîstên Kurd a li Londrayê bi dawî bibe û zexta dewleta Îngilîstanê ya dagirker a li dijî civak û tevgerên siyasî şermezar dikin.’’