Li bajarê Hamburg ê Elmanyayê li dijî êrîşên dewleta Tirk a dagirker û çeteyên wê yên li ser Rojava, li stasyona trenê ya Hamburgê meş hate lidarxistin. Çalakiya ku bi pêşengiya Tevgera Ciwanên Şoreşger (TCŞ) û bi tevlîbûna Kurdistanî û dostên wan hatî lidarxistin, ji bo bîranîna Şehîdên Azadiya Kurdistanê bi deqeyek rêzgirtinê destpê kir.

Li ser navê TCŞ’ê Ciwan Çewlîg axivî û got, “Divê em bi hemû hêza xwe ji bo parastina xaka azad, tevbigerin. Divê em li her derê weke madî û manewî bi Şoreşa Rojava re bin. Çeteyên hov bi piştgiriya dewleta Tirk ji bêdengiya hêzên navneteweyî sûd werdigirin û li dijî sivîlan komkujiyan pêk tînin. Rêxistinên mafên mirovan û yên navneteweyî, ti nerazîbûn nîşan nadin. Li komkujiyan temaşe dikin. Bi deh hezaran Kurd neçar man ji xaka xwe koç bikin. Gelê Rojava bi biryar e û berxwedana xwe didomîne; lê em jî dikarin rabin ser piyan û vê berxwedanê bi serketinê bi encam bikin. Em ji bîr nekin ku ev berxwedana li Rojava, berxwedana mirovahiyê ye. Kurdistanî û dostên wan ên li Ewropayê dijîn, divê bertek nîşan bidin û vê dagirkerî û komkujiya li dijî sivîlan, rawestînin.”

AKDOGAN: DEWLETA TIRK CIL Û BERGÊ DAÎŞ’Ê GUHERT

Siyasetmedar Nîhat Akdogan jî ev tişt got: “Weke hûn dizanin, dewleta Tirk li dijî Rojava di nava şerekî mezin de ye. Navê DAÎŞ’ê îro bi destê dewleta Tirk hatiye guhertin û bûye OSO. Her kes baş dizane ku dewleta Tirk tenê cil û bergên wan guhertiye. Îro ji Şamê heta Rojavayê Kurdistanê, komkujiyek heye. Di van rojan de, em dizanin ku heta Minbic, Tebqa, Kobanê bi dehan mirovên me jin, zarok û kal hatine qetilkirin. Em ji vir dibêjin ku gelê Kurd ji bo Rojhilata Navîn û hemû baweriyan, hêzek e.”

Piştre girseyê pankartên “Kobanê rûmeta me ye” , “Defend Rojava”, “Lebe nicht den Kapitalismus Lass den Kapitalismus nicht Leben”, “ Frieden für Rojava und Syria, Nein zum Krieg”, “US stop supporting Turkish Massacre of Kurds” û alên YPG, YPJ û TEV-DEM’ê hildan û dirûşmeyên “Hoch Die internationale Solidaritat”, “Türkischer Armee raus aus Kurdistan”, “Bijî Berxwedana Rojava”, “Bijî Serok Apo”, “Bijî Berxwedana YPG”, “Bijî Berxwedana YPJ”, “Bijî Berxwedana QSD” berz kirin û heta avahiya Rathaus meşiyan.

Di tevahiya rê de jî, bi zimanê Elmanî û Kurdî têkildarî êrîş û planên dagirkeriyê yên dewleta Tirk û çeteyên wê, daxuyanî hatin dayîn.