Di çarçoveya pêngava 'Azadî ji Abdullah Ocalan re, çareseriya siyasî ji pirsgirêka Kurd re' ku ji aliyê dostên gelê Kurd ve beriya salekê hate destpêkirin, li Barcelonayê Komîteya Komîteya Jineolojiyê û 'Parastina Kurdistanê' ku enternasyonalîst jî di nav de ne, çalakî lidar xistin.

Li qada Angel Pestana Nou Barrisê performanseke hunerî hate nîşandan û bi daxwaza 'Azadî ji Abdullah Ocalna re' wêne hatin amadekirin.

Piştî vê performansê Komîteya 'Parastina Kurdistanê' bi beşdariya gelek kesan daxuyaniyek li ser pêngavê da. Di daxuyaniyê de tecrîda mutleq a li ser Rêberê Gelê Kurd Abdullah Ocalan hate şermezarkirin û polîtîkayên dewleta Tirk weke 'faşîzmê' hate pênasekirin. Her wiha hate destnîşankirin ku pêngav wê teqez bi ser bikeve.

Bi beşdariya gelek kesan semînerek li ser mijara 'Azadiya Jinê û Xweparastinê' hate lidarxistin.

Li bajarê Granada yê li herêma Andalucia ya Spanyayê jî oma piştevaniya Kurdistanê û koma La Tasquiva çalakiyeke hevpar lidar xistin.

Di semînerê de mijarên paradîgmaya 'Konfederalîzma Demokratîk', 'Neteweya demokratîk', 'Ekolojî' û 'Modernîteya demokratîk' hatin nirxandin.

Di semînerê de hate destnîşankirin ku têkoşîna ji bo pêngava 'Azadî ji Abdullah Ocalan re' wê dewam bike.