Greva birçîbûnê ya li Navenda Civaka Demokratîk a Kurd a Strasboûrgê 17'ê Kanûnê dest pê kir, 27 roj li pey xwe hişt. Welatparêzên li derdora Strasboûrgê dimînin û malbatên hin çalakgeran serdana çalakiyê kirin.

Malbata çalakgerê bi navê Kerem Solhan, ji bajarê Dragûîgnan ê Fransayê serdana çalakgeran kir. Malbata Solhan çalakger hemû silav kir, piştgirî da wan û diyar kir, berxwedan wê bi ser bikeve.

Ferdên malbatê ji CPT xwestin ku tavilê bikeve nava liv û tevgerê û bi bîr xistin ku rewşa tenduristiyê ya Leyla Guven êdî li asta krîtîk e.

Yek ji çalakgeran, Hevserokê Kongreya Civaka Demokratîk a Kurdistaniyên li Ewropayê (KCDK-E) Yuksel Koç e. Malbata Koç jî hat Strasboûrgê û destek da çalakiyê.

Hevserok û zarokên Yuksel Koç li cihê çalakiyê axivîn û diyar kirin, ji bo wan giran jî be ew destekê didin çalakiyê.

Kurê Koç Mazlûm Koç û Olîver-Jann Kornaûs ku endamên partiya çep a Elmanyayê ne, serdana çalakgeran kirin.

Ji çalakgerên greva birçîbûnê Parlamentera berê ya HDP'ê Dîlek Ocalan û Mûstafa Sarikaya doh tevlî meş û mîtînga li Parîsê bûbûn û diyar kiribûn, heta ku tecrîdkirina Ocalan bi dawî bibe wê çalakiya xwe bidomînin.