Çalakvanên Cenevreyê bang li dewleta Tirk kirin ku ji bo Banga Aşitî û Civaka Demokratîk gavên pêwîst biavêje û ji Komîseriya Bilind a Mafên Mirovan a Neteweyên Yekbûyî xwest ku ji bo pêkanîna edaletê tevkarî bike.
Çalakiya rûniştinê ku ji bo azadiya Rêber Apo li bajarê Cenevre yê Swîsreyê dewam dike, vê hefteyê li qada Quai Wilson Komîseriya Bilind a Mafên Mirovan a Neteweyên Yekbûyî (OHCR) lê ye, hat lidarxistin.
Beriya çalakiya rûniştinê di şexsê çalakvanên fedaî yên Kurdistanê Zulkuf Gezen û Avesta Xabur de deqîqeyek rêz hate girtin.
Piştre li ser navê Komîteya Amadekar a Cenevreyê ji aliyê Velî Eren ve daxuyaniya çapemeniyê hate xwendin. Velî Eren Banga Aşitî û Civaka Demokratîk a Rêber Apo silav kir û wiha got: “Ev banga dîrokî baweriya me ya aşitî û demokrasiyê ya li herêmê me xurt kir û bêhnekî nû da têkoşîna azadiyê. Sekna wêrek û bi biryar a Rêber Apo ne tenê li Rojhilata Navîn, li cîhanê îlhamê dide her kesên ku lêgerîna aşitî û demokrasiyê dike. Em bang li dewleta Tirk dikin ku ji bo bangê gavên pêwîst biavêje.”
Velî Eren wiha bang li OHCR’ê kir: “Ji sûcên şer û mirovahiyê ku desthilatdariya AKP’ê li dijî gelê Kurd pêk tîne, bêdeng nemînin. Bêdengmayîn hevkariya sûcê ye. Guh bidin vê banga dîrokî û ji bo pêkanîna aşitî û edaletê tevkariyê bikin.”
Çalakiya rûniştinê di saet 17:00’an de bi dawî bû.
