MUB, Komkujiya Simele di salvegera wê de şermezar kir. Di daxuyaniyê de hat diyarkirin ku hê jî zîhniyeta DAIŞ’ê cîhanê tehdîd dike, ji DYA û YE hat xwestin ku li hember DAIŞ’ê helwest bigirin û banga valaderxistina polîtîkayên DAIŞ’ê hat kirin.
Desteya Serokatiyê ya Konseya Neteweyî ya Bethnahrîn (MUB), bi wesîleya salvegera Komkujiya Simele daxuyaniyeke nivîskî weşand.
Di daxuyaniyê de wiha hat gotin: "Gelê Suryanî-Asûrî-Keldanî-Aramî bi taybetî li Iraqê, giştî li her parçeyê xaka xwe dibe hedefa êrîşên giran ên hêzên serwer. Gelên xwecih û qedîm ên Rojhilata Navîn ku bi polîtîkayên paqijiya etnîk û dînî hatine ber qiraxa tinekirinê, di roja me de careke din bi komkujiyên rêxistina hovîtiyê DAIŞ’ê re rû bi rû hatine hiştin.”
BANG LI DYA Û DEWLETÊN EWROPAYÊ HAT KIRIN
Di daxuyaniyê ku banga avakirina jiyaneke demokratîk hemdem hat kirin, ji DYA û welatên Ewropayê hat xwestin ku alîkariyê bidin gelên bindest. Her diyarkirin ku divê bala xwe bidin polîtîkayên ku çeteyên DAIŞ’ê xurt dikin û banga valaderxistina polîtîkayên DAIŞ’ê hat kirin.
MUB'ê di daxuyaniya xwe de bal kişand ser vê xisûsê jî: "Gel û saziyên me yên welatparêz pêwîst e li her cihî ala berxwedana şehîdên me yên Simele bilind bikin. Pêwîst e dagirkirina Deşta Nînova li her cihî bê şermezarkirin, bi gelê me yê neçar ma cih û warê xwe terk bike û di nav şert û mercên giran de ye, pira piştevaniyê bê avakirin. Em Komkujiya Simele ya 7’ê Tebaxê û 6’ê Tebaxê dagirkirina Deşta Nînova ji bîr nekin.”
