Komîteya Ekolojî ya Komelgeha Demokratîk û Azad ya Rojhilatê Kurdistanê (KODAR) têkildarî talankirina daristanên Zagrosê daxuyaniyek nivîskî weşand.

KODAR’ê got; “Piştî talankirina daristanên Hirkanî li bakurê Îranê, diyar e ku dor gihîştiye daristanên Zagrosê. Ev demeke ku mafiyaya ya girêdayî hêzên Sipaha Îranê, berê xwe dane daristanên Zagrosê. Bêdengiya berpirsên hikûmetê yên li bajarên derdora Zagrosê hiştiye ku xerabkirin û talankirinekî mezin di xwezaya vê herêmê de çêbibe. Li aliyê din hawirdorparêz rojane ji aliyê dewletê ve tên destgîrkirin û hêzên îstixbaretê zext û êrîşên xwe li dijî saziyên jîngehan zêde kiriye.”

KODAR’ê talanker û kesên piştevaniya wan dike hişyar kir û wiha got; “Em weke parçeyek girîng ê xwezayê li mirovan dinêrin, parastina xwezayê parastina hebûna mirovhaiyê ye. Ev rol û peywira me ya exlaqî ye. Di heman demê ku em piştevaniyê didin sazî û çalakên jîngeparêz, em dibêjin ku em ê li hember van êriş û talankirinên ku di herêmê de rû didin bêdeng nemînin. Em hişyarî didin kesên sûcdar, ku hêzên me ji bo parastina gel û xwezaya xwe, wê wan bidin nas kirin û hesabê ji wan bixwazin.”