KNK'ê ji bo hunermendê Kurd Seîd Ûsiv ku bi nexweşiya pençeşerê li Stenbolê ya Tirkiyê koça dawî kir daxuyaniyek da. KNK'ê got, ''Bi kovanek mezin me xeberê koça dawiyê ya hunermendê Kurd ê navdar Seîd Ûsiv bihîst, koça dawî ya vî hunermendê mezin ji dil û can em hemû xembar kirin. Her wiha seranserî cîhana mûzîk û hûnera resen a Kurdî hejand û perîşanî xiste derûnê hunerdostan.''

'MÎRÊ SAZA KURDÎ'

KNK'ê bi berdewamî derbarê Seîd Ûsiv got, ''Mamoste Seîd Ûsiv bi dirêjiya temenê xwe girêdayî xebat û xizmetkirina stran û mûzîka Kurdî bû, sazbend û mûzîkjenekê melevan bû di deryaya hunera Kurdî da. Di warê hunerê de, ew serkêş û serkarwan û mamosteyekî bernas û bêhempa bû. Awazên sozdariyê, resenatiya dengbêjiyê û awazdaneriyê di dinyaya mûzîkê de sîmayên wî bûn. Ew bi mîrê saza Kurdî hatibû navdar kirin.''

'DENGÊ WÎ DI GUHÊ ME DE, DI MAL Û KOLANÊN ME DE WÊ TIM SAX BIMÎNE'

Daxuyaniya KNK'ê ya derbarê koça dawî ya Seîd Ûsiv wiha ye:

''Bi koç û malavayîkirina wî, serbarê hiştina xem û kovanek mezin, ew ê tim û heya Kurd, çand û zimanê wan hebe, li asimanê hunera Kurdî weke fenerek geş, bi şewq û şemalek bimîne. Dîsa jî wê barzîng û rêbaza wî ya hunerî, wê weke xwendingehekê bimîne û berdewam be.

Em Kongreya Neteweyî ya Kurdistanê (KNK) bi xem û kovanek mezin ve serexweşiyê li malbat, gelê Kurd û Kurdistanîyan û tevaya dost û aşiqên dengê Xwedê jê rezî mîrê biziqê mamoste Seîd Ûsiv dikin.

Bi vê bûnê em daxwazê ji temamî sazî û dezgehên taybetmendyên mûzîka Kurdî dikin, ku berhem û mûzîka vî junermendê Kurd ê navdar biparêzin, xwedî lê derkevin û şopa wî dewam kin. Her wiha em ji tevaya gelê xwe daxwazin xwedî li malbata wî derkevin û wan bi tenê nehêlin.

Dangê mamoste Seîd Ûsiv wê di guhên me de, di kolan û malên me de, tim sax bimîne, şemala dengê resen Seîd Ûsiv wê heya dawiyê koçik û dîwanên me bi şewiq û rohnî bi hêle.''