Encamên yekemîn ên hilbijartinên parlamentoya Elmanyayê diyar bûn. Tê payîn ku encamên fermî di saetên pêş de bên eşkerekirin.

Li gorî encamên destpêkê, tê payîn ku partiya muhafezekar CDU/CSU ji sedî 29 deng wergirtiye û bûye partiya yekemîn. Tê payîn ku Friedrich Merz bibe serokê Elmanyayê.

Tê payîn ku Partiya Alternatîf a ji bo Elmanyayê (AfD) ya rastgir bi rêjeya ji sedî 20 wê bibe duyemîn; bi vê rêjeyê re dengê xwe ji hilbijartina 2021’an (ji sedî 10,4 girtibû) du qatan zêdetir kir.

Tê payîn ku Partiya Sosyal a Demokrat (SDP) ya li desthilatdariyê ye bi rêjeya ji sedî 16’an wê bibe partiya sêyemîn. Ev encam ji bo wê encama herî xirab a hilbijartinên federal e.

Hem FDP a lîberal û hem jî tifaqa Sahra Wagenknecht pir nêzîkî benda ji %5 a hilbijartinê ne.

Di hilbijaritanê de CDU/CSU %28,9, AfD %19,7 deng wergirt. Piştî wan SPD ji sedî 16,1 û Keskan jî bi sedî 13,2 tên. Dengê Partiya Çep ji sedî 8,6 e. FDP (%4.9) û BSW (%4.8) deng wergirtin û bi vê rêjeyê wê karibin bikevin Meclîsa Federal a Elmanyayê (Bundestag)

SCHOLZ TÊKÇÛNA XWE QEBÛL KIR

Li gorî texmînan, SPD di hilbijartinên federal de bû sêyemîn û ev jî ji bo wê tê wateya encama herî xirab.

Serokwezîr Olaf Scholz (SPD) bertek nîşanî texmînên ewil ên hilbijartinê da û got: “Ev encam ji bo SPD’ê encameke xirab e û di heman demê de têkçûna hilbijartinê ye.”

Hevserokê SPD’ê Lars Klingbeil diyar kir ku partiya wî ji ber encamên nebaş ên hilbijartinên parlamentoyê ew matmayî ne û got: “Ev encameke dramatîk û têkçûnek ku em ne li bendê bûn.” Klingbeil behsa qutbûna ji SPD’ê kir û got ku partî, divê hem ji aliyê bernameyê û hem jî ji aliyê kesayetî ve ji nû ve bê birêxistinkirin.

MERZ SERKETINA XWE ÎLAN KIR

Friedrich Merz weke yekîtî, CDU û CSU di hilbijartinên 2025’an de bi ser ket.

Merz wiha got: "Ez di ferqa berpirsyariya ku dikeve ser milê min û mezinahiya erka ku li benda me ye, de me. Ez vê yekê bi hurmeteke mezin pêşwazî dikim û dizanim ku wê ne hêsan be."

Merz anî ziman ku divê êdî hevdîtin dest pê bikin û wiha domand: "Beriya her tiştî, ew ê demildest li Elmanyayê hikûmeteke kêrhatî û parlamentoyeke pir rengîn ava bikin. Cîhana derve ne li benda me ye, ne li benda hevdîtinên dirêj ên koalîsyonê ye (…). Ji bo li Ewropayê dîsa em hebin û di hundir de tiştên divê bên kirin, ew ê bi lezgînî têxin meriyetê.”         

AfD’Ê DENGÊN XWE DU QATAN ZÊDE KIR

Seroka AfD a rastgir Alice Weidel danê êvarê daxuyaniyek da û diyar kir ku partiya wê li gorî anketên destpêkê ji sedî 19,5 û 20'ê dengan stendiye û wiha got: "Em ti carî li seranserê welat ewqasî bi hêz nebûbûn.”

DIE LINKE DENGÊ XWE BILIND DIKIN

Die Linke bi rêjeya ji sedî 8,5 dengan 62 kursiyên parlamentoyê bi dest xist.