Hevşaredara Agirî Mukaddes Kûbîlay a li Hopaya ku karesata lehî û hezazê pêk hat lêkolînan dike, têkildarî rewşa dawî ya li herêmê çavdêriyên xwe û xebatên alîkariyê vegot.

Kûbîlay diyar kir ku rewşa li Hopayê pir xeter e û got: “Di roja sêyemîn de dema em li wir bûn ji ber barana zêde lehî çêbû. Ev afeteke mezin e.”

Kûbîlay anî ziman ku 9 kesan jiyana xwe ji dest dane û 2 kes jî hê winda ne. Kûbîlay wiha dewam kir: “Tê gotin ku wê baran hefteyekê bidome. Di tevahiya robar de malên ku di bin avê de mane hene. Pêwîst e ev herêm bê valakirin. Hê nehatiye valakirin.”

Kûbîlay diyar kir ku êşa li Hopayê êşa her kesî ye û got: “Ji bo pêşî li vê afetê bê girtin divê xebateke bi koordîne bê kirin. Îro li vir dibe ku sibe li cihekî din be. Projeyên HES û bendavan rê li ber afetên wiha vedike.”

'ALÎKARÎ Û MAKÎNEYÊN KAR GIHIŞTIN HOPAYÊ'

Kûbîlay der barê xebatên xwe de ev agahî da: "Em hem çûn herêma lehî û hezazê hem jî em çûn herêma ku robar bi ser ve çûye. Em çûn cem kesên xizmên xwe winda kirine. Di dema lêkolînan de me lîsteya pêdiviyan derxist. Bi awayekî cidî pêwîstî bi av û xurekê heye. Şaredariyên me ji bo vê bilez ketin nav tevgerê û alîkarî hatin şandin. Makîneyên kar hatin, hinek di rê de ne. Ji Agirî, Wan û Îdirê bi TIR’an av û kelûpelên alîkariyê hatin. Dîsa ji Agirî îtfaiye û vîdanjor, ji Amed û Wanê makîneyên kar ketin rê hin ji wan gihiştin vir.”

HOPAYÎ: ‘ME DÎT EM NE BI TENÊ NE’

Kûbîlay da zanîn ku gelê Hopayê di nav rewşeke zor û bendewariyeke mezîn de ye û wiha got: "Gelê Hopayê heyeta me bi erênî pêşwazî kîr. Em ji bo piştevaniyê çûn, me xwest kêm jî be êşên wan fêm bikin. Ji derveyî çareserkirina pêdiviyan wan jî ji bo wan bû moralek. Tevî me ji malbatan re got, ‘madî- manewî çi pêwîst be em amade ne pêk bînin’ jî, ji milê madî zêdetîr qîmetek mezin a manewî dan ziyareta me. Gotin ‘Me dît em ne tenê ne.’”