Li qada xwezayî ya li taxa Gorundu ya navçeya Westan a Wanê, agir bi qada Zilê ket. Di şewatê de ku sedema wê hînê nehatiye zanîn, Zil ên ku qada jiyanê ya bi dehan cûre zindî û çivîkan e, şewitî.

Sedema şewatê neyê zanîn jî, tê zanîn ku bi biharê re gundî ji bo çêrandina sewalên xwe yan jî ziwakirina qadên şilî ji bo çandiniyê, agir ber didin qadên ji zilê. Her sal êrîşên bi vî rengî li ser qadên ji zilê pêk tên.

Endama Komîsyona Ekolojî û Hawirdorê ya Baroya Wanê Gulbahar Dogan li ser şewata li qada ji zilê ya li herêmê got, "Di mehên biharê de şewitandina qadên şilî mixabin pirsgirêkeke ku her sal rû dide. Me bi şewata li Qada Şilî ya li Gorundu dît ku ti tedbîr nayê wergirtin. Divê li destwerdanên mirovan ên li qada şilî ceza bêne birîn."

Gulbahar Dogan ev bang kir, "Em bang li siyasetmedarên bajêr, saziyên cemaweriyê yên pêwendîdar, rêxistinên civakî yên sivîl û xelkê Wanê dikin ku ji bo parastina qadên şilî hevkariyê bikin. Ji ber ku tenê bi hevkariyê çareserî ji vê pirsgirêkê re dikare bê dîtin. Her wiha ji bo tespîtkirina berpirsyaran wê gilî bê kirin û em ê mijarê bişopînin."