Piştî ku Serokkomar Emmanuel Macron meha bihurî serdana Korsikayê kir, bendewariyek afirî û hikumetê roja Duşemê pêşniyarek kir. Lê belê ev pêşniyar nebû bersiv ji bendewariyan re.

Daxuyaniya hikumetê ya li ser naskirina 'rewşa xweser' a giravê nehate qebûlkirin ku ev yek di xala 72-5 a destûra bingehîn de ji bo Korsikayê cih digire.

Serokê Herêma Korsikayê Gilles Simeoni piştî ku bi wezîrê Fransî Jacqueline Gourault re rûnişt, daxuyanî da û rexne kir ku hikumetê cih nedaye pênaseya 'xweseriyê'.

Simeoni destnîşan kir ku ev yek gelekî kêmî bendewariyên gelê Korsikayê ye û diyar kir, xala heyî ya destûra bingehîn bi ti awayî cih nade statuya rêveberiya xweser.

Partiyên neteweperest û alîgirên xweseriyê yên Korsikayê dixwazin, ew bi navê xwe di Destûra Bingehîn a Fransayê de cih bigirin û statuya wan a xweser bê naskirin.

Xala destûra bingehîn a ku bi pêşniyara hikumeta navendî hate amadekirin, lê ji aliyê partiyên Korsikayî ve nayê qebûlkirin, tê payin ku pêşkêşî Serokkomar Macron were kirin.