Madûro di axaftineke merasîma leşkerî de got, “Ez dixwazim Serok Trûmp gotinên gerînendeyê CIA’yê yên bêhurmet û mudaxelekar rave bike.”

Madûro got ku, şefê CIA’yê Pompeo ji bo hikumeta Venezûelayê hilweşîne bi hikumetên Meksîka û Kolombiyayê tevkariyê dike.

Wezîrê Karê Derve yê Venezûelayê Samûel Moncada diyar kir ku rayedarê CIA’yê gotiye, “Ez du hefte berê li Bogota û Meksîkoyê bûm. Bi awayekî zelal min qala guherîneke siyasî ya li Venezûelayê kir.”

Li ser vê gotinê Serokkomarê Venezûelayê Madûrê xwest ku bila hikumeta Meksîka û Kolombiyayê vê gotinê rave bikin. Di heman demê de Madûro bang li van hikumetan kir kıu bila li hemberî vê bêhurmetiya CIA’yê pêkanînên siyasî û dîplomatîk bike.

Wezareta Karê Derve ya Venezûelayê di roja Duşemê de daxuyand, ew tu carî tevlî karê navxweyî yê Venezûelayê nebûne.

Ji zû ve ye li Venezûelayê krîza siyasî û ekonomîk heye. Di dawiya vê hefteyê de wê Meclîsa Damezirîner were diyarkirin a ku Madûro dixwaze.

Muxalefeta rastgir a ku Washington piştgiriya wê dike, hewldanên xwe yên ji bo betalkirina hilbijartinên 30’ê Tîrmehê zêdetir kir.

Mûxalefet ji meha Nîsanê û vir ve li hemberî hikumeta Madûro çalakiyan li dar dixe. Di çalakiyan de heta niha 103 kes mirine, bi hezaran kes birîndar bûne û bi sedan kes jî hatine binçavkirin.