Li gorî daxuyaniya ofîsa Lîbyayê ya ÎOM'ê, keştî piştî ku ji Zuwara ya ji bakurrojavayê Lîbyayê bi rê ket, li ber pêlên bilind ên deryayê ket û noqî binê avê bû.

Di daxuyaniyê de hate ragihandin ku li gorî gotina yên sax mane, di keştiyê de nêzî 86 kes hebûn.

IOM'ê diyar kir ku jin û zarok jî di nav de piraniya koçberên di keştiyê de ji Nîjerya, Gambiya û welatên din ên Efrîkayê bû. Hate ragihandin ku 25 kes hatine rizgarkirin û li Lîbyayê birine navendeke binçavkirinê.

Lîbya û Tûnis ji bo çûyîna Ewropayê ya di ser Îtalyayê re du rêgehên esasî yên metirsîdar in.

Berdevkê IOM'ê Flavîo Dî Gîacomo li ser hesabê X'ê daxuyaniyek da û ragihand ku îsal li Derya Spî ya Navîn zêdeyî 2 hezar û 250 mirov mirin.

Dî Gîacomo got, "Hejmareke dramatîk e ku mixabin nîşan dide, ji bo rizgarkirina ji deryayê hewldanên têrker nehatine kirin."