Li gle hişyariyên gefxwarinê yên hikumetê jî çalakî duh li gelek bajaran dewam kirin. Di çalakiyan de 2 rojên destpêkê zêdeyî 200 kes hatin binçavkirin. Duh jî gelek çalakger ji aliyê polîsan ve hatin girtin.

Li paytext Tûnisê û bajarê Tebûrbayê duh êvarê polîsan bi bombeyên çavan dişewitîne dest li xwepêşandêran werdan û tê gotin ku gelek çalakger birîndar bûne. Roja Duşemê çalakgerek hatibû kuştin. Piştî vê kuştinê bîlançoya mirinê nayê zelalkirin.

Wezîrê Karên Hundir Halîfe Şîbanî li ser xwepêşandana daxuyanî da û anî ziman ku duh bi şev herî kêm 45 wesayitên polîsan û gelek avahî hatine şewitandin.

Wekî din, di çalakiyên dijî polîtîkayên teserûfê de êrîşên provokatîf balê dikişînin. Li dijî Sînagoga El Grîba ku li girava Cerbe ye û sînagoga herî kevn a Afrîkayê ye bi molotof kokteylan êrîş hate kirin. Nayê zanîn ku di bûyerê de tiştek bi kesî hatiye yan na. Çeteyên El Qaîdeyê jî sala 2002'an êrîşî vê sînagogê kiribûn û 21 kes kuştibûn.

Li Tûnisê, di çarçoveya qanûna malî ya sala 2018'an de ji 1'ê Çileyê û pê ve zem hate kirin û polîtîkaya teserûfê kete meriyetê. Di çarçoveya qanûnê de zema bacê li gelek berheman hate kirin. Mazot, otomobîl, xizmetên telefonê û înternet çend ji van e.