Koma Lîmayê ya ku Arjantîn, Brezîlya, Kanada, Şîlî, Kolombiya û Meksîka di nav de ye, encamên hilbijartina serokkomariyê nas nekirin a ku roja Yekşemê li Venezûelayê hate kirin.

Koma Lîmayê daxuyaniyeke hevpar da û diyar kirin ku wan têkiliya xwe ya dîplomatîk ên bi Venezûelayê dane sekinandin. Di daxuyaniyê de hate diyarkirin ku hilbijartin li gorî normên navneteweyî nehatine kirin û ne demokratîk e.

Koma Lîmayê di 14’ê Gulanê de daxuyanî dabû ku bila hilbijartin were betalkirin. Ji ber ku hemû aktor tevlî hilbijartinê nebûbûn, heyeteke çavdêr a serbixwe tunebû û mîsogeriyên pêwist nehatibû dayîn, ev hincet hatibûn pêşkêşkirin.

Koma Lîmayê di Tebaxa 2017’an de ji bo ku reformên demokratîk li ser hikumeta Madûro ferz bike û girtiyên siyasî serbest bide berdan hatibû avakirin. Koma Lîmayê di warê Venezûelayê de daye ser şopa Washîngtonê.