Fermandariya Giştî ya YPG'ê daxuyand ku ewlekariya li Şêxmeqsûd û Eşrefiyê dewrî Hêzên Ewlekariya Hundirîn hatiye kirin û da zanîn ku vekişîna qismî ya hêzên wan bi dawî bûye û hêzên mayî jî dê di rojên pêş de gav bi gav bên bicihkirin.
Fermandariya Giştî ya Yekîneyên Parastina Gel (YPG) derbarê veguhestina erkên asayîşê li taxên Şêxmeqsûd û Eşrefiyê yên Helebê daxuyaniyek da.
Di daxuyaniyê de hat ragihandin ku ji qonaxa dawî ya şerê li Sûriyeyê heta niha şêniyên taxên Şêxmeqsûd û Eşrefiyê yên Helebê li hemberî gefên berdewam sîstemeke parastinê ya xweser û rêxistinkirî ava kirine; YPG û YPJ’ê ji destpêkê ve bi awayekî çalak piştgirî dane vê xeta berxwedanê û xurt kirine.
Di daxuyaniyê de bal kişandin ser wê yekê ku di vê serdemê de berdêlên girîng hatin dayîn û hat gotin, "Deskeftiyên stratejîk ên bi dest ketine, di misogerkirina ewlekarî û aramiya gelê sivîl de roleke diyarker lîstin. Geşedanên dawî careke din bandor û berdewamiya vê hewldana kolektîf piştrast kir. Yekîneyên me bi disîplîn û hesteke zelal erka xwe bi cih anîn."
Di daxuyaniyê de hate destnîşankirin ku li gorî rêkeftina dawî ya di navbera Rêveberiya Xweser a Bakur û Rojhilatê Sûriyeyê û Hikûmeta Demkî ya Sûriyeyê de, berpirsyariya ewlehiyê li Şêxmeqsûd û Eşrefiyê bi awayekî fermî ji Hêzên Ewlekariya Hundirîn re ku di bin serweriya Rêveberiya Xweser de tevdigerin, hate veguheztin û hate gotin, "Vekişîna qismî ya hêzên me ji niha ve bi awayekî rêkûpêk bi cih bûye û dê gav bi gav vekişîna hêzên me bi dawî bibe."
Daxuyanî wiha bi dawî bû: "YPG û YPJ bi rêgezên xwerêveberiyê û îradeya rêxistinbûyî ya gelan re girêdayî ne. Em ê helwesta xwe li gorî pêdiviyên stratejîk ên qonaxa nû biguherînin."
