Cenazeyê Şahîn Elî ku di 28’ê Kanûna 2023’yan de li gundê Korê Simoqyê yê Şengalê di encama bomberdûmana dewleta Tirk a dagirker de li ser konê ku karkerên Rojava ji bo gel bîrên avê dikolan de bi 4 hevalên xwe re şehîd bibû, hate veşartin. Li Şehîdgeha Şehîd Dîcle bi merasîmekê li Kobanê hate lidarxistin.

Gerîlayê Yekîneyên Parastina Rojhilatê Kurdistanê (YRK) Êrîş Berxwedan (Sadiq Şêx Ehmed) ê ku di 3’yê Kanûna 2023’yan de di encama êrîşa dewleta Tirk a li ser Pêncewînê de şehîd bibû, hate bîranîn.

Di merasîmê de endama rêvebera Meclîsa Malbatên Şehîdan a navçeya Şêranê Bedîa Miho axivî û ev tişt anî ziman: "Şervanê me ji bo avakirina civakeke azad ji bo nifşekî tê dikoşiya û rêya berxwedanê dişopand. Lê dijminê xedar li her devera Kurdistanê êriş dike, lê dîsa jî li hemberî îrade û berxwedana  gel û gerîla têk çûye."

Hevserokê Yekitiya Ajokaran Ebduselam Mistefa axivî û wiha got: " Va ye Şervanê me li hemberî duyemîn dewleta NATO'yê berxwedaniyê dike, ew dewlet li çiyayên azad bi bin ketiye, asê bûye û şikestiye. Dewleta Tirk bi hemû teknîka pêşketî êriş dike. lê îradeya me û berxwedana me hemû teknîk û êrşa wê têk dibe." 

Li ser navê malbata şehîd Şahîn Elî, Emîra Elî diyar kir ku dewleta Tirk a dagirker li ser xwîna Kurdan berdewam dike, Geliyê Zîlan, Dêrsim û Komkujiya Koçgirî, bi hemû awayê dixwaze vê neteweyê tune bike û wiha got: "Va ye bi awayekî rojane herêmên me û Herêmên Parastinê yên Medyayê topbaran û bombebaran dike. Binesaziyên herêmê dike hedefa xwe. Lê me soz daya ku em ê xwedî li şehîdên xwe derkevin."

Piştî axaftinê wesîqa şehîd hat xwendin û radestî malbatê hat kirin.

Merasîm bi dirûşma" Şehîd namirin" bi dawî bû.