Navenda Ragihandinê ya Hêzên Sûriyeya Demokratîk (QSD) bîlançoya şerê 24 seatên dawîn ya ‘Berxwedana Serdemê’ ragihand. QSD’ê destnîşan kir ku artêşa Tirk bi çeteyên xwe ve sivîl û warên welatiyên sivîl dikin hedef. Di van êrîşan de welatiyên sivîl şehîd û birîndar dibin.

QSD’ê di daxuyaniyê de ev tişt diyarkir;

“Tevî biryara Konseya Ewlekariyê ya navneteweyî, dewleta Tirk a dagirker êrîşên li dijî herêma Efrînê didomîne û biraya konseyê binpê dike. Li hember van êrîşan hêzên me neçar dimînin ku bersiv bidin û gelê Efrînê biparêzin.

ŞERA

Li eniya Şera hêzên me wesayîteke leşkerî ya Artêşa Tirk a dagirker li derdora gundê Çema şopand û kir hedef. Di encamê de wesayît bi temamî hate rûxandin.

Êrîşên artêşa Tirk a dagirker û çeteyên DAIŞ û El-Nusra yên li ser gundên Şerayê didomin. Bi vê yekê re hemwext, balefirên Tirk gundên Sînka, Baflûn, Meydankê yên Êzidiyan û navneda navçeyê bombebaran dike.

CINDIRÊSÊ

Dagirkeriya Tirk bi çekên giran û balafiran êrîşî navçeyê dike û rast e rast sivîlan dike hedef. Di encamê de duh li gundê Kefer Sefrê şehîd û birîndarên sivîl çêbûn.

Di rojên dawî de balefirên Tirk bênavber navenda herêma Cindirêsê û gundê Miskê Foqanî bombebaran dike. Hat zanîn ku li vê eniyê şehîd û birîndarên sivîl (di nav de zarok û jin) hene.

RACO

Balafirên Tirk gundên eniya Raco bênavber bombebaran dikin. Li aliyekî din jî bi çekên giran êrîşî herêmê dikin.

Li gundê Meydan Ekbesê jî artêşa Tirk a dagirker malên sivîlan şewitandin.

Îro di saet ên sibehê de jî artêşa dagirker û çeteyên wê bi dijwarî êrîşî gundê Berbenê krin û sivîl kir hedef . Hat zanîn ku bi dehan sivîl birîndar bûn û ji bo dermankirinê rakirin Nexweşxaneya Avirîn.

BILBILÊ

Artêşa dagirker û çeteyên wê eniya Bilbilê bi çekên giran topbaran dikin û ji şevê din ve balafirên Tirk bênavber navçeyê bombebaran dikin.

MABETA

Îro ji saetên sibehê de artêşa Tirk a dagirker û çeteyên wê gundên Mîrkan, Şîtka û Birîmca yên eniya Mabatayê bi çekên giran topbaran dikin.″