Meclîsa Leşkerî ya Suryanî bi daxuyaniyeke nivîskî nasnameya şervanê xwe yê bi navê Mehmûd Îdal El Salih (Krîstîan) eşkere kir.

Daxuyaniya Meclisa Leşkerî ya Suryanî wiha ye:

"Piştî tinekirina rêxistina terorîst a DAÎŞ‘ê ya di warê leşkerî de ku di pêngava Bagera Cizîrê de dawiya wan li bajarê Baxoz ê Dêra Zorê hêzên me mil bi milê hêzên din ên di bin sîwana Hêzên Sûriyeya Demokratîk de pêngavên xwe yên li dijî şaneyên rêxistina terorîst a DAÎŞ‘ê didomîne. Şaneyên rêxistina terorîst a DAÎŞ‘ê hewl dide tevlîheviyê derxîne û ewlehiya welat û welatiyên li herêmên Bakur û Rojhilatê Sûriyê ku navenda jiyana hevbeş a hemû pêkhateyane têk bibe. Hêzên me dikarîbûn bargehên terorîstan birûxînin û gelekan ji wan bigirin. Her wiha rêjeyek mezin a çek û teqemeniyan desteser bikin. Em rêbazên rêxistina terorîst nas dikin, dema tengav dibin berî didin çalakiyên teqîn, kuştin û çandina mayînan. Bûyerên dawî ku li Hesekê û Qamişlo rû dane delîlê herî ber bi çav ê sûcên vê rêxistinê ye. Hemû kesên di van bûyeran de şehîd bûne sivîl bûn.

Di 20’ê Tebaxa 2019`an de wesayîteke me ya leşkerî li Dêra Zorê li nêzî bajarokê El-Sebha dema erka xwe pêk dianî, ket kemîna şaneyên rêxistina terorîst. Di encamê de şervanê me Mehmûd Îdan El-Salih (Kirstiya) şehîd bû û du şervanên din jî bi giranê birîndar bûn.

Em ji gelê xwe yê Suryan û Asur û hemû gelên herêmê re teqez dikin ku em şopdarên xeta şehîdan in ên ku ji bo parastina vî welatî û jiyana hevbeş a hemû gelen berdêlên giranbûha dane. Em soza xwe bi şehîdan re nû didin ku xwîna li erdê naçe, lê belê dê bimîne bingeha avakirina demokrasî, avakirina edalet, pêkanîna heq û belavkirina aştiyê di nav civakek hevpar li ser rêgeza biratiya gelan de."