Di encama şerê navbera hêzên desthilata Şamê û çekdarên ji bermahiyên rejîma berê de, komkujî û binpêkirin li dijî welatiyên zêde bûn, bi hezaran welatiyên li van herêman ber bi herêma Ekar a Lubnanê ve penaber bûn. Ew welatiyên ji ber êrişên li peravê direvin, berê xwe didin gundên elewî yên li bakurê Lubnanê.

Çavkaniyên ji Lubnanê diyar kir ku bi hezaran welatî gihîştin 5 an 6 gundên Elewî yên li Ekar. Heman çavkanî anî ziman ku di rojekê de nêzî 10 hezar kes gihîştinê Lubnanê. Ew welatî bi rêya nerewa re derbasî Lubnanê dibin.

Girêdayî heman mijarê, di raporên xwecihî de hat gotin ku bi dehan malbat ketin baregeha Himêmîm a gundewarê Laziqiyê. Çavkaniyan got ew malbat bi saetan sekinîn heta ku hêzên Rûsyayê hişt ew derbasî baregehê bibin.