Bi sedan welatiyên bajarê Minbicê cenazeyê şervanê Meclîsa Leşkerî ya Minbicê Samir Xelef Hîlal (Baran Kurdî) ê ku di Pêngava Xezeba Firatê de şehîd bibû, ji nexweşxaneya Minbicê wergirtin û ber bi Goristana Şehîdan a Minbicê ve ketin rê.

Di merasîma oxirkirinê de Fermandarê Meclîsa Leşkerî ya Minbicê Ednan Ebû Emce, Hevserokê Meclîsa Zagonsaz a Minbicê Farûq El-Maşî, cîgirê Hevserokatiya Meclîsê Qasim Remo, Hevseroka Meclîsa Rêveber Zeyneb Qenber û Endamên saziyên sivîl, amade bûn.

Li goristanê merasîm li gel deqeyek rêzgirtina leşkerî destpê kir. Piştre li ser navê Saziya Malbatên Şehîdan Îbrahîm Xilêf axivî, sersaxî ji malbata şehîd re xwest û soza şopandina rêya wî da.

 Fermandarê Meclîsa Leşkerî ya Minbicê Ednan Ebû Emce jî sersaxî ji tevahî malbatên şehîdan re xwest û wiha got: ″Em ê heta nefesa xwe ya dawî li ber xwe bidin, gelê xwe û welatê xwe biparêzin.″

Her wiha Hevseroka Meclîsa Rêveber Zeynet Qenber jî anî ziman cangoriyên azadiyê bi têkoşîna xwe êrîş û komployên dijmin bin xistin û anî ziman: ″Eê hemû pêkhateyên Bakurê Sûriyeyê bi saya fedekariya şehîdên azadiyê, azad bibin.″

Di dawiyê de nasnameya şehîd hat xwendin, radestî malbata wî hat kirin û cenazeyê wî li goristanê hate veşartin.