Pêngava cîhanê ya ji bo Azadiya Rêberê Gelê Kurd Abdullah Ocalan li 74 navendan li seranserî cîhanê di 10`ê Cotmehê de bi dirûşma "Ji Abdullah Ocalan re azadî û ji pirsgirêka Kurd re çareseriya siyasî" bi pêşengiya kesayet û saziyên li ser asta navneteweyî û cîhanê dest pê kir. Pêngav fireh bû û heta niha hejmara navendan gihaşt 100`î. Her wiha gelek saziyên civakî yên herêmên Bakur û Rojhilatê Sûriyeyê piştgiriya pêngavê kirin.

Însiyatîfa Ji bo Azadiya Rêber Abdullah Ocalan a Sûriyeyê û Parêzerên Sûriyeyî yên Ji bo Parastina Rêber Abdullah Ocalan, li qada Çerxerêya Rêber Abdullah Ocalan a li taxa Şêxmeqsûd a Helebê bi dirûşma "Ji Rêber Abdullah Ocalan re azadî û ji pirsgirêka Kurd re çareseriya siyasî" çalakiya konvedanê li dar xist.

Şêniyên taxê, endam û nûnerên partiyan û saziyên sivîl tevlî çalakiya konvedanê bûn.

Li gor berpirsan, çalakî dê 3 rojan berdewam bike: Wê peyamên beşdaran bên parvekirin. Semînerên hiqûqî têkildarî sûcên desthilata Tirk li dijî Rêberê Gelê Kurd Abdullah Ocalan, ji aliyê Însiyatîfa Parêzerên Sûriyeyî yên ji bo Parastina Rêber Abdullah Ocalan re bên lidarxistin. Her wiha belgefîm der barê jiyan û têkoşîna Rêberê Gelê Kurd Abdullah Ocalan de werin pêşandan.