Meş ji pêşiya Parka Rêber Apo ya li taxa Nasira ya bajarê Hesekê destpê kir. Ciwanan alên Partiya Sûriya Pêşerojê, pankartên bi nivîsên "Bi ruhê şehîdên xwe û şehîdên Parîsê em ê li hemberî dagirkeriya Tirk bisekinin, destkeftiyên xwe biparêzin, Sûriyeke demokratîk, pirrengî û nenavendî ava bikin" û "Bi ruhê têkoşîna Sara û Evînan em ê azadiya jinan mîsoger bikin" hildan û bê navber dirûşmeyên şermezarkirina êrîşên dewleta Tirk a dagirker û silavkirina berxwedana QSDʹê berz kirin.

Meş li ber avahiya Komîteya Jîngeh û Şaredariyan a bajarê Hesekê veguherî mîtîngê. Berdevkê Meclisa Ciwanan a Partiya Sûriya Pêşerojê Fereh Salim daxuyanî xwend.

Di daxuyaniyê de hate diyarkirin ku dewleta Tirk a dagirker bi armanca têkbirina projeya Rêveberiya Xweser û yekitiya pêkhateyên herêmê êrîşên xwe li ser herêmên Bakur û Rojhilatê Sûriyeyê didomîne.

Fereh El Salim anî ziman ku dewleta Tirk bi hinceta parastina ewlehiya xwe ya neteweyî, di nava bêdengiya navneteweyî de sûcên şer li dijî şêniyên Bakur û Rojhilatê Sûriyeyê dike.

Di daxuyaniyê de wiha hat gotin: "Em weke Meclisa Ciwanên Partiya Sûriya Pêşerojê helwesta xwe û kombûna xwe li derdora QSD’ê tekez dikin û bi hemû hêza xwe amade ne destkeftiyên gelê xwe yên ku bi saya xwîna pak a şehîdan bi dest xistine, gelê xwe biparêzin."

Mîtîng bi berzkirina dirûşmeyên dilsoziya bi şehîdan re û silavkirina berxwedana jinan bi dawî bû.