Navenda Ragihandinê ya Hêzên Sûriyeya Demokratîk (QSD), li ser Pêngava Bagera Cizîrê li malpera xwe ya înternetê daxuyaniyek weşand.

Di daxuyaniyê de ev agahî hatin dayin:

"Şervanên QSD'ê ku Meclîsa Leşkerî ya Dêra Zorê jî di nav de ye cih digirin, di çarçoveya Pêngava Bagera Cizîrê de ya li dijî terorîstan bajarokê El-Behra yê rojhilatê Dêra Zorê rizgar kirin. Ev dever ji bargehên girîng ên terorîstên DAI'‘ê ne, ku tê de ambarên wan ên çek û cebilxaneyên hene. Her wiha weke nuqteya pêkanîna êrîşên bombekirî li dijî sivîlan û jêdera êrîşên li dijî şervanên QSD'ê dihate dîtin.

Hêzên me  li derdora vî bajarokî, bi terorîstan re ketin nava şer de û bersiva her êrîşên wan dan. Di şerê 20 rojên dawî de, şervanên me derbên giran li terorîstan dan, tevî ku bi sedan mayîn li derdora bajarok û di nava malan de jî hatin danîn, lê şervanên me bi pisporî nêzî vê yekê bûn û herêm rizgar kirin.

Di şerê rizgarkirina El-Behra de ku bi destekdayîna balafirên koalîsyona navdewletî pêk hat, hêzên me miqdareke mezin ji çek û cebilxaneyên çeteyan desteser kirin. Fermandariya meydanî ya şer jî diyar kir ku 20 rojên dawî hezar û 776 çete hatine kuştin, 16 topên hawanê, 17 wesayitên bombekirî, 8 çekên doçka, 14 wesayitên doçka li ser, 24 tirks, 3 bargehên bombekirina wesayitan, 2 panzêr, 5 balafirên keşfê, 7 motosîkletên barkirina cebilxaneyan, 1 fuze, 2 wesayitên BMB, 12 wesayitên leşkerî, 1 obus, 3 wesayitên barkirina cebilxaneyan û wesayiteke SPG3 ketine destê şervanên me.

Pêngava Bagera Cizîrê ku ji aliyê Meclîsa Leşkerî ya Dêra Zorê ve ji bo rizgarkirina bejahiya gundewarên Dêra Zorê tê meşandin, bi xurtî didome."