Li gorî agahiyên ji çavkaniyên xwecihî hatin wergirtin, endamên koma çete ya 'Feyleq El Şam' a ser bi dewleta Tirk a dagirker ve ye, li gundê Bûrc Heyder ê navçeya Şêrawayê sivîlê bi navê Arîf Gulê Xeyrî revand. Nayê zanîn ku kesê hatiye revandin bi ku ve birine.

Di daxuyaniyeke beriya niha ya Rêxistina Mafên Mirovan a Efrîn-Sûriyeyê de hatibû ragihandin ku koma çete ji bo danûstandina narkotîkê ya navbera herêmên hikumeta Şamê û gundên Şêrawayê hêsan bikin, dor li gundê Bûrc Heyder pêçandine.

Her wiha ragihand ku çeteyan erebeyeke barhilgira 5 kg eroîn û zêdetirî mîlyon û nîvek hebên captagonê ji bajarokên Nibul û Zehrayê, di rêya gundê Burc Heyder re derbasî Efrînê kir.

Li gorî Rêxistina Mafên Mirovan a Efrîn-Sûriyeyê, çeteyên "Feyleq El Şam" girtin ser mala welatiyê bi navê Arif Ebû Silêman (52) ê ji gundê Burc Heyder û dest danîn ser tevahî telefonên destan ên malbatê.