Çalakiyên li dijî tecrîda li dijî Rêberê Gelê Kurd Abdullah Ocalan didomin.

Bi sedan şêniyên kantonên Efrînê meşeke girseyî li dar xist û ji bo azadiya Rêber Abdullah Ocalan bang kirin.

Meş ji pêşiya nexweşxaneya Avrîn a bajarokê Fafînê ber bi kampa Berxwedan a Şehbayê ve dest pê kir. Di meşê de diruşmeyên silavkirina Rêber Abdullah Ocalan û banga rakirina tecrîdê hatin berzkirin.

Li kampa Berxwedan meşvanan deqeyek rêz girtin. Piştre, endama Kongreya Star Wehîda Xelîl axivî û diyar kir ku dewleta Tirk a dagirker êrişî herêmên Bakur û Rojhilatê Sûriyê dike da ku vîna gelê Kurd ê berxwedêr ê ku ji bo azadiya xwe û azadiya rêber Abdullah Ocalan têdikoşe bişkîne.

Wehîda got, gelê Kurd wê teslîm nebe û wê li hemberî hemû êrişan li ber xwe bide.

Endama Meclîsa Jinên Azad a Şehbayê Efwiya Bekir tecrîda li dijî Rêber Abdullah Ocalan şermezar kir û bang li rêxistinên navdewletî û mafên mirovan ên cîhanê kir ku erka xwe bi cih bînin û tecrîdê bi dawî bikin.

Meş bi dirûşmeyên silavkirina berxwedana Îmraliyê bi dawî bû.