Cenazeyên 2 şervanên YPG'ê Ezet Şere (Hesen Hemdo) û Botan (Mihemed Îbrahîm) ên di qonaxa duyemîn a Berxwedana Serdemê de şehîd bûn, ji nexweşxaneya Avrîn a navçeya Fafînê ya Şehbayê hatin wergirtin û ji bo merasîmê ber bi gundê Meratê El-Mislimiyê hatin şandin.

Bi hezaran welatiyên herêmên Efrîn û Şehbayê li meydana gund li hev civiyan û ji bo merasîmek lidar xistin.

Di merasîmê de 21 şervanên ku di qonaxa yekemîn a berxwedana li dijî dagirkeriya Tirk şehîd bûn hatin bîranîn.

Piştî deqeyeke rêzgirtinê, bi navê Meclîsa Malbatên Şehîdan Xelîl Ehmed axivî, sersaxî ji malbatan re xwest û got, "Gelê me çiqasî li ber xwe bide wê azad bibe û bi ser bikeve."

Bi navê Meclîsa Herêma Şehbayê Fatmê Cimo jî got, "Em ê her tim zarokên xwe bidin azadî û demokrasiya welat."

Hevseroka Rêveberiya Xweser a Kantona Efrînê Şîraz Hemo jî got, "Van pakrewanan canê xwe bê teredût feda kirin ji bo azadiya welat û ji bo têkbirina planên dewletên desthilatdar."

Di dawiyê de nasnameya şehîdan radestî malbatên wan hate kirin û cenazeyên şehîdan li Goristana Şehîdên Serdemê ya li navçeya Ehrezê hatin veşartin.