Gelê Girê Spî li hemberî dewleta Tirk xwe diparêzin
Hêzên Parastina Civakî (HPC) li hemberî gefên dagirkeriyê yên dewleta Tirk, herêmê diparêzin.
Hêzên Parastina Civakî (HPC) li hemberî gefên dagirkeriyê yên dewleta Tirk, herêmê diparêzin.
Şêniyên herêmên Bakur û Rojhilatê Sûriyê bi ked û hêza xwe di nava refên QSD’ê, Hêzên Ewlehiya Hundirîn û Hêzên Parastina Civakî (HPC) de parastina herêmên xwe dikin.
Li bajarê Girê Spî, tevî gefxwarinên Tirkiyeyê û zêdekirina leşkerên xwe li ser sînor, şêniyên bajêr di nav refên HPC`ê, Hêzên Ewlehiya Hundirîn û QSD`ê de, parastina ewlehî û istiqrara bajarê xwe dikin.
Endamên van hêzan dibêjin ku armanca Tirkiyê ji gefxwarinan û zêdekirina leşkerên xwe li ser sînor ew e ku derbeyê li ewlehî, istiqrar û jiyana hevbeş a li herêmê bixe. Şêniyan tekez kir ku ew ê herêmên xwe biparêzin.
Koko Ekmekciyan şêniyê ji bajarê Girê Spî ye û Ermen e. Ekmekciyan ê endamê HPC`ê wiha got: “Em wek şênî û pêkhateyên Girê Spî parastina bajar û şêniyan dikin. Em bi rêya danîna bendên kontrolê di hundirê bajêr û derdora wê û derketina dewreyan di nav bajêr de, bajarê xwe diparêzin."
Koko Ekmekciyan diyar kir ku Tirkiye bi rêya gefxwarinên xwe armanc dike ku projeya biratiya gelan û jiyana hevbeş a li herêmê têk bibe.
Mihemed Hesen endamekî din ê HPC`ê ji pêkhateya Ereb û şêniyê bajarê Girê Spî ye. Hesen got ku "Em di ewlehiyê de dijîn. Tirkiye hewl dide derbeyê li ewlehiya herêmên me bixe û leşkerên xwe li ser sinorê Girê Spî zêde dike. Em ê jî herêmên xwe biparêzin."