Bi sedan gelê Kantonên Efrîn û Şehbayê li pêşiya Meclîsa Malbatên Şehîdan a Navçeya İhrisê kom bûn û cenazeyên şehîdên Berxwedana Serdemê Xunav Memo (Buhar), Bekir Mistefa (Dilşêr Efrîn), Zemzem Osman (Şervan Efrîn), Îsmayîl Ehmed (Tolhildan) û şehîdekî din ku nasnameya wî nehate zanîn, bi merasîmekê spartin axê.

Girseya gel ji pêşiya Meclîsa Melbatên Şehîdan a Navçeya Ehrezê dest bi meşê kir û bi berzkirina dirûşmeyên "Şehîd namirin" û nîşaneyên serkeftinê, li kolanên sereke meşiyan.

Dema ku gel gihîşt Goristana Şehîdên Navçeya Ehrezê, cenazeyên şehîdên Berxwedana Serdemê danîn ser dika rûmetê. Piştre gel deqeyekê rêz girt û bi navê Meclîsa Malbatên Şehîdan Xelîl Îbrahîm derbarê fedekariyên şehîdan axaftinek kir û wiha got: "Bi saya şehîdan Berxwedana Serdemê ya li hember dagirkeriya Tirk û çeteyên wê didome."

Her wiha Xelîl da zanîn ku bi vîna şehîdan û soza tolhildanê Efrîn wê bi ser bikeve. Îbrahîm di berdewamiya axaftina xwe de diyar kir ku Meclîsa Melbatên Şehîdan hê li ser soza xwe ya bi şehîdan re ye û diyar kir ku gelê ku jiyaneke azad û birûmet bixwaze divê bi xwîna zelal xaka xwe av bide.

Her wiha Hevseroka Meclîsa Kantona Şehbayê Wefa Hisên di derbarê rewşa zehmet û berxwedana bêhempa de axivî û wiha anî ziman: "Tevî rewşa herêmê ya zehmet hê jî têkoşerên me berxwedana li hember dagirkeriya Tirk berdewam dikin û canê xwe fedayî Efrînê dikin. Em jî soz didin ku em ê rêya qehremanên xwe bişopînin û heta dilopa dawî ji xwîna xwe li dijî artêşa Tirk a dagirker li ber xwe bidin."

Wefa di dawiya axaftina xwe de bêdengiya civaka navneteweyî ya li hember êrîşên dewleta Tirk a dagirker û çeteyên wê yên li ser Efrînê şermezar kir û bang li cîhanê kir ku ji bêdengiya xwe derkeve, binpêkirinên dagirkeran rawestîne û wan ji Efrînê derxîne.

Di merasîmê de gelek axaftin bi navê malbatên şehîdan hatin kirin. Di axaftina de hate diyarkirin ku ew ê şopdarên rêya şehîdên xwe bin û tola wan hilînin. Her wiha axêveran dan zanîn ku ew bi şehadeta zarokên xwe yên ku li hemberî dagirkeriyê li ber xwe dan, ser bilindin.

Piştî axaftinan, Meclîsa Malbatên Şehîdan nasmaneyên şehîdan xwendin. Her wiha nasnameyên Hisên Nebîkewn (Hisên Bêrîtan) û Ocalan Îbrahîm (Doxan) hatin ragihandin.

Piştre gel cenazeyên şehîdan spartin axê û merasîm bi dirûşmeyên "Bijî Berxwedana Serdemê" û "Şehîd rêberên me ne" bi dawî bû.