Li gorî daxuyaniya malpera fermî ya Hêzên Sûriya Demokratîk (QSD), Fermandariya Giştî ya QSD’ê bi beşdariya nûnerên Koalîsyona Navneteweyî salvegera 10’emîn a Şoreşa 19’ê Tîrmehê pîroz kir.

Şahî bi merasîmeke leşkerî a ji hêla Yekîneyên Antîterorê (YAT) ve dest pê kir, dûre fermandarê Giştî yê QSD’ê Mezlûm Ebdî axivî û salvegera 10’emîn a Şoreşa 19’ê Tîrmehê li tevahî gelên Bakur û Rojhilatê Sûriyê, malbatên şehîdan û li tevahî şervanan pîroz kir.

Mezlûm Ebdî got: "Dewletên dijber hewl da ji roja destpêka wê ve ku li bajarê Kobanê dest pê kir, şerê vê şoreşê bikin. Lê belê vîna hêzên me û berxwedana gelê me ew hemû plan hatin têkbirin û me li dijî hemû komên terorîst şer kir. Dewleta Tirk piştgirî dida van komên terorîst. Ji "Artêşa Azad" bigire heta bi Cebhet El-Nusra û rêxistina DAIŞ’ê ya terorîst, me li dijî van komên terorîst şer kir. Em îro xwe bi rêxistin dikin û potansiyala hêzên xwe ji bo parastina destkeftiyên bi saya fedekariya şehîdan pêk hatine, xurt dikin."