Li gorî agahiyên çavkaniyên herêmê teşkîlata îstixbarata Tirk MÎT’ê li navçeya Raco ya Efrînê welatiyê bi navê Esmet Mihemed cara 5’ê Îlonê revand ku berê hatibû revandin.

DI 8 MEHAN DE HERÎ KÊM 270 KES HATIN REVANDIN

Dewleta Tirk ji sala 2018’an û vir ve li Efrîna dagirkirî rejîmeke terorê ava kiriye. Li gorî Rêxistina Mafên Mırovan a Efrîn-Sûriyeyê dewleta Tirk û çeteyên wê di meha Tebaxê de 62 kes revandine ku 6 ji wan jin bûn. Hat diyarkirin ku yek ji jinên hatî revandin rastî desdirêjiya çeteyan hatiye.

Di navbera Meha Çile-Tîrmehê de jî herî kêm 208 kes hatin revandin. 17 hezar dar hatin birîn. Rêxistina Mafên Mirovan wiha qala sûcên sîstematîk ên dewleta Tirk kiribû: “Dewleta Tirk a dagirker li herêmê ji xeynî komkujî, revandina mirovan, şîdet, fîdye, desteserkirina mal û milkê gel, bi sûcên firotina kel û pelên desteserkirî û qirkirina xwezayê mafên mirovan binpê dike.”

DI 8 MEHAN DE BI DEHAN ZAROK HATIN QETILKIRIN

Di 8 mehên destpêkê yên salê de, li herêmên Efrîn û Şehbayê di encama teqînan de 15 zarok hatin qetilkirin û 16 zarok birîndar bûn, 4 zarok rastî destdirêjiyê hatin, 9 zarok hatin girtin, di encama êrîşa zayendî û êşkenceyê de zarokek hat qetilkirin, 6 ji wan birîndar bûn, yek jê pitik 8 zarok hatin revandin, 6 zarok jî di encama êrîşê de hatin qetilkirin.