Piştî êrîşên dagirkeran ên di 9’ê Cotmehê de li herêmê gelek gund hatin valakirin. Bi sed hezaran kes ji warên xwe bûn û bandoreke neyînî li çandiniyê bû. Li gelek gundan ên ku hatine valakirin, mal û erdên gundiyan hatin talankirin, alavên wan hatin dizîn.

Li gundê Rabîat ê Zirganê jî ev erd hatin berdan. Li gund kêm kes man. Her dem dengê bomberdûmanê tê. Gelek kesan ji neçarî erd û malên xwe terikandin. Yên mane jî bi fikar in.

Îdrîs Huseyîn ê ji gundê Rabîatê di 10’ê Mijdarê de ji ANF’ê re axivî û gotku “Topan diavêjin gundên Til Werd, Rabîat û Ereb Xanê û êrîşên hewayî dikin. Em nizanin ji ku derê tên, bi tenê dengê teqînê tê û em dibînin ku toz û duman radibe. Em li ser axa bav û kalên xwe ne. Ji ber êrîşên dagirker gel dev ji erd û erzaqên xwe berda. Hinek ji wan zarokên wan li cihekî ne, ew li cihekî ne. Têkiliya wan qut bûye.”

Huseyîn diyar kir ku ev baxçeyên zeytûnan mîrateyeke bi salan e û niha hemû hatine berdan û ew nikarin berhemên xwe kom bikin. Huseyîn bal kişand ser vî tiştî ku wan dev ji mal û warên xwe berdane û di şertên dijwar de dijîn.

Huseyîn got ku “Li vê derê jiyana me xweş bû. Têkiliya me ya bi cîranên me yên Ereb re baş bû. Cîranên me yên Ermen û Xirîstîyan jî hebûn”. Huseyîn bal kişand ser vî tiştî ku bi dagirkeriyê re erd û malên wan hatine talankirin û desteserkirin.