Bi sedan welatiyên  bajarên Dêrikê, Girkê Legê û gundewarên herêmê, wêneyên Rêberê Gelê Kurd Abdullah Ocalan û cangoriyên azadiyê hildan û berê xwe dan nexweşxaneya Dêrikê. Girseya gel cenazeyên Endama Hêzên Asayîşê Zeyneb Ebdullah ku di encama qezayeke trafîkê de jiyana xwe ji dest dabû, şervanên YPG’ê Zerkûf Eslan (Heqî Tirkan) û Umer Yildiz (Robar Cemce) ku di Pêngava  Xezeba Firatê de jiyana xwe ji dest dabûn, wergirtin û ber bi goristana Şehîd Xebat Dêrik ve ketin rê.

Di merasîma oxirkirinê de Hevseroka Meclîsa Federal a Bakurê Sûriyê Hediye Yûsif û nûnerên Rêveberiya Xweser a Kantona Cizîrê amade bûn.

Li goristanê ji bo cangoriyên Kurdistanê deqeyekê rêz hat girtin û merasîmeke leşkerî hat lidarxistin. Piştre Fermandara Hêzên Asayîşê Uzlem Axa axivî, sersaxî ji malbatên cangoriyan re xwest û wiha got: “Şehîd Zeyneb bi vîneke xurt parastina civaka xwe dikir, jin diparast. Ez soza domandina têkoşîna nû didim."

Hevseroka Meclîsa Federal a Bakurê Sûriyê Hediye Yûsif jî di kesayeta van her sê şehîdan de, hemû cangoriyên azadiyê bi bîr anî û wiha got: “Bi saya fedakariya şehîdan, gelek serkeftin li Bakurê Sûriyê hatin bidestxistin û gelên herêmê hatin rizgarkirin. Em soza domandina  têkoşînê û parastina destkeftiyên şoreşê didin.”

Piştre nasnameya şervanan hatin xwendin û radestî malbatên wan hatin kirin.

Cenazeyên şervanan bi tilîlî û dirûşmeyan li Goristana Şehîd Xebat Dêrik hatin veşartin.