Cenazeyê şervanê YPG’ê Ehmed Xelîl (Devrîm Xelîl) ê di berxwedana rizgarkirina bajarê Tebqa de jiyana xwe ji dest da ji aliyê endamên Rêveberiya Xweseriya Demokratîk, TEV-DEM û saziyên civakî jî di nava de bi sedan welatiyên Amûdê û gundên wê ve ji Meclîsa Malbatên Şehîdan a Amûdê hate wergirtin.

Girseya gel ku bê navber dirûşm qîriya, cenaze bir goristana Şehîd Îsmaîl Hogir. Li goristanê merasîm hate lidarxistin. Mersîm bi rêzgirtina leşkerî ku ji aliyê şervanên YPG/YPJ'ê ve dest pê kir.

Paşê li ser navê Meclîsa Malbatên Şehîdan Mustefa El-Umerî axivî û sersaxî ji malbata şehîd Devrîm û hemû şehîdên azadiyê re xwest û destnîşan kir ku serkeftiyên li herêmê hatine bidestxistin, bi saya tekoşîn û fedekariya şehîdan pêk hatiye.

Di dewama merasîmê de yek ji fermandarên YPG’ê Amed Agirî axivî  û diyar kir ku berxwedana YPG’ê ji bo parastina Şoreşa Rojava berdewame û got: "Wê ev parastina me heya ev şoreş azdiya mayînde pêk bîne, dewam bike. Wekhevî û edaletê bidome. Şoreşa Rojava û xaka wê bi xwîna şehîdan hatiye parastin û wê tu caran YPG serê xwe li hemberî êrîş û zordariyan ne tewîne."

Amed di dawiya axaftina xwe de bang li ciwanan kir ku tevlî nava refên YPG’ê bibin.

Piştî axaftinan nasnameya şervanê YPG'ê Devrîm xwendin û radestî malbatê hate kirin. Li ser navê malbata şehîd Devrîm jî dayika wê axivî û destnîşan kir ku gelê Rojava wê tola şehîdên xwe li erdê nehêle û wê hate pêkanîna azadî û rûmetê tekoşîna xwe ya li ser rêya şehîdan bidomînin.

Di dawiya merasîmê de girseya gel cenazeyê şervanê YPG'ê Devrîm bi dirûşman spartin axê.