Bi sedan welatiyên Kantona Kobanê cenazeyê şervanê YPG’ê Mustefa Hisên (Şoreş Kobanê) ku dema bi erka xwe radibû şehîd bûbû, ji nexweşxaneya bajar wergirtin û bi karwaneke wesayîtan ber bi Goristana Şehîd Dîcle ve bi rê ketin.

Li goristanê ji bo bîranîna şehîdên têkoşîna azadiyê deqîqeyek rêz hat girin û ji aliyê şervanan ve merasîmeke leşkerî hate lidarxistin. Piştre Cîgirê Serokê Desteya Parastinê ya Kantona Kobanê Nebo Temo û Hevserokê Kantona Kobanê Mustefa Îto axivîn. Axaftvanan şehîdên azadiyê yên ji bo avakirina jiyaneke azad û demoratîk canê xwe feda kirine bibîr anîn û soza şopandina rêya şehîdan dan.

Piştre nasnameya şehîd hate xwendin, radestî malbata wî hate kirin. Girseya gel cenazeyê şervanê YPG’ê Şoreş Kobanê bi dirûşme û tilîliyên dayikan li goristanê spart axê.