Bi sedan welatiyên Dêra Zorê cenazeyê şervanê QSD’ê Ayiş Xelef (Yamin Hesekê) ku di Pêngava Bagera Cizîrê ango ‘Şerê Tunekirina Terorê’ de şehîd bûbû bi merasîmekê li Goristana Şehîd Xidir El-Hemade veşartin.

Li goristanê ji bo bîranîna şehîdên têkoşîna azadiyê deqîqeyek rêz hate girtin û ji aliyê şervanan ve merasîmeke leşkerî hate lidarxistin. Piştre yek ji fermandarên QSD’ê Azad Hesekê axivî û wiha got; “Ji bo rizgarkirina gelê herêmê ya ji zilm û zordariyê, şehîd têdikoşin û canê xwe feda dikin.”

Piştre li ser navê Meclîsa Sivîl a Dêra Zorê, Saziyên Olî, Meclîsa Ebû Xeşeb û Partiya Pêşerojê ya Sûriyeyê axaftin hatin kirin. Di axaftinan de sersaxî ji malbata şehîd û gelê Bakur-Rojhilatê Sûriyeyê re hate xwestin.

Piştre nasnameya şehadetê ya şervanê QSD’ê Yamin Hesekê hate xwendin û radestî malbatê hate kirin. Girseya gel bi dirûşme û tilîliyan cenazeyê Yamin Hesekê li goristanê veşart.