Bi sedan şêniyên bajêr û gundên derdorê, rûspiyên bajêr, nûnerên saziyên Rêveberiya Xweseriya Demokratîk a Bakur û rojhilatê Sûriyeyê, cenazeyê şervanê Hêzên Sûriyeya Demokratîk (QSD) Serhed Hesekê (Ehmed Murad Hisên) li Goristana Şehîd Dijwar a li gundê Dawûdiye veşart.

Şehîd Serhed li Hesekê 16’ê Çileya 2024’an dema li ser erka xwe ya leşkerî bû, şehîd bûbû.

Di merasîmê de, endamê Meclîsa Malbatên Şehîdan Mistefa Osman axivî û sersaxî da malbata şehîd.

Osman fedakariyên şehîdan di oxira parastina herêmê de kirin, silav kirin û got: "Şehîd Serhed Hesekê, fermandarekî bêhempa bû, mînakê lehengiyê û fedakariyê bû. Jiyana xwe ji bo parastina herêmê borand."

Ji fermandarên Meclîsa Leşkerî ya Kantona Cizîrê Şoreş Hesekê jî axivî û îşaret bi rola şehîd Serhed Hesekê ya di nava QSD’ê de kir û got: "Serhed, ji dema tevlî hêzê bûye, bê teredud erkên jê dihatin xwestin pêk dianî."

Şoreş Hesekê soz da ku rêya şehîdan ji bo parastina herêmê û sepandina ewlehiyê berdewam bikin.

Piştre wesîqeya şehadeta şehîd Serhed Hesekê hate xwendin û radestî malbatê hate kirin. Piştî wê, girseya gel cenazeyê şehîd li goristanê spart axê.