Bi sedan welatiyên bajarê Girê Spî, Hevserokatiya Rêveberiya Xweser a bajêr, Endamên saziyên sivîl alên YPG/YPJ/QSD′ê, wêneyên şehîd rakiribûn, cenazeyê şervanê QSD′ê Ebdulezîz Hesen wergirtin û ber bi Goristana Şehîd Mehmûd Tumê ve ketin rê.

Li goristanê merasîm bi deqeyek rêzgirtina leşkerî ve despê kir. Piştre Hevserokê Rêveberiya Xweser a bajêr Hemdan El-Ebid axivî, sersaxî ji malbat û hevalên şehîd re xwest û wiha got: ″Em serbilind in. Bi saya fedekariya cangoriyên azadiyê, herêmên me azad dibin û civakeke li ser bingeha hezkirin, jiyana hevbeş û biratiya gelan tê avakirin.″

Her wiha li ser navê Kongreya Star Muna Eswed jî sersaxî ji malbata şehîd re xwest û soza domandina têkoşînê dubare kir.

Di dawiya merasîmê de nasnameya şehîd hat xwendin, radestî malbatê hate kirin.

 Girseyê cenazeyê bi dirûşmên ‘Şehîd Namirin’ ve spartin axê.