Bi sedan şêniyên Efrînê li pêşiya Nexweşxaneya Avrîn a li navçeya Fafînê ya kantona Efrînê hatin gelhev û cenazeyê Şehîd Ebdulhemîd Îsmaîl ku di qonaxa duyemîn a Berxwedana Serdemê de şehîd bûye, wergirt.

Di merasîma oxirkirinê de endama Meclîsa Malbatên Şehîdan a herêma Efrînê Xedîce Îbo axivî û got: “Şehîd Ebdulhemîd Îsmaîl ji bo azadiyê û ji ber ku zilm û zordestiya li ser gelê xwe qebûl nekir, şer kir û şehîd bû.”

Di merasîmê de endamê Meclîsa Kantona Şehbayê Mistefa Şakir jî axivî û qala girîngiya berxwedana ku şervanên HRE’yê kir û pêwîstiya şopandina rêya şehîdan heta rizgarkirina Efrînê û herêmên din ên dagirkirî yên Sûrye yê piştrast kir.

Piştî axaftinên hatîn kirin, endamê Komîteya Perwerdeya Civaka Demokratîk a kantona Şehbayê Umer Elo wesîqeya şehadeta şehîd xwend û radestî malbata wî kir. Piştre girseya gel cenazeyê şehîd bi karwanekî wesayîtan ber bi bajarokê Um Hoşê ve rê ket.