Bi sedan welatiyên herêma Tebqayê cenazeyê endamê Hêzên Ewlekariya Hundirîn Feysel Zewada (Feysel Tebqa) ê dema erka xwe bi cih dianî şehîd bû, li pêşiya nexweşxaneya Wetenî kom bûn. Girse piştî ku cenaze wergirtin bi kerwanekî wesayîtan ber bi Goristana Şehîdan a Tebqayê ve ketin rê.

Li goristanê merasîmeke leşkerî bi deqeyek rêzgirtina şervanên Hêzên Ewlekariya Hundirîn ve destpê kir.

Endamê Hêzên Ewlekariya Hundirîn a Tebqayê Muhened El-Ehmed helbest li ser hevalê xwe yên şehîd xwendin.

Hevserokê Komîteya Aborî ya Rêveberiya Sivîl a Tebqayê Ehmed Silêman û endama Meclîsa Malbatên Şehîdan Emîna Ebdulrezaq axivîn. Di axaftinan de sersaxî ji malbata şehîd re hate xwestin û dilsoziya bi şehîndan re hate dubarekirin. Kesên axivîn diyar kirin ku rizgarkirina Bakur û Rojhilatê Sûriyê berhemên keda şehîdan e.

Nasnameya şehîd Feysel ji aliyê endama Meclîsa Malbatên Şehîdan Yasmîn El-Ehmed ve hate xwendin û radestî malbatê hate kirin.

Di dawiya merasîmê de girseya gel cenazeyê şehîd Feysel di nav dirûşme û tilîleyên dayikan de veşartin.