Bi sedan şêniyên bajarê Qamişloyê cenazeyê şervanê QSD’ê Ebdulqadîr Brahîm ku di 9’ê Kanûnê de li Herêma Hacîn a Dêrazorê şehîd bûbû bi merasîmek girseyî li Goristana Şehîd Delîl Sarûxan veşart.

Di merasîma veşartinê de endamên saziyên sivîl, leşkerî, Kongra Îslama Demokratîk, hevrêyên şehîd û nûnerên Rêveberiya Xweser jî amade bûn. Piştî deqeyek rêzgirtinê ji bo cangoriyên azadiyê, li ser navê Meclîsa Malbatên Şehîdan a Qamişloyê Fatma El Casim axivî. 

El Casim, diyar kir ku li dijî êrîşên dewleta dagirker wek Kurd xwedî hêza berxwedanê ne û got, “Kurd bi berxwedana xwe bi ser dikevin. Em ê her tim têkoşîna xwe li hember dijmin mezin bikin û xwedî li şehîdên xwe derkevin.”  

Li ser navê Kongra Îslama Demokratîk Silêman Ehmed jî ev tişt gotin, ”Em bejna xwe li hemberî şehîdên xwe ditewînin. Bi saya fedekariya wan a li hemberî welat, em gihiştin vê asta bilind. Em soz didin dayik û bavên şehîdan, Rêber Apo û gelê xwe ku em ê heta dawiyê li hemberî êrîşan li ber xwe bidin.” 

Ji fermandarên Meclîsa Leşkerî ya Qamişloyê Nezîr Sofî, jî diyar kir ku ew ê li hember êrîşan bisekinin û got, ”Şehîd ji bo parastina rûmeta welatê xwe canê xwe feda dikin. Bila dayik û bavê her şehîdekî serê xwe hilde jor, ji ber ku bi parastina welatê xwe gihiştin asta şehadetê.”  

Piştî axaftin bi dawî bû, wesîqeya şehîd hate xwendin û radestî malbata wî hat kirin. Di dawiyê de cenazeyê şehîd bi dirûşmeya ”Şehîd namirin” li Goristana Şehîd Delîl Sarûxan hat veşartin.