Cenazeyê şervanê Hêzên Ewlekariya Hundirîn Ayaz Ebdullah yê di 20’ê Mijdara 2022’an de li gundê Teqel Beqel şehîd bibû, li Goristana Şehîd Xebat Dêrîk hat veşartin. Bi sedan şêniyên navçeya Dêrikê, Girkê Legê û Çilaxa tevlî merasîma veşartinê bûn.

Di merasîmê de endamê rêveberiya Meclîsa Malbatên Şehîdan Elî Yusif axivî û sersaxî da malbata şehîd û soz da ku rêya şehîdan bişopîne ta ku aştî pêk were.

Endama Rêveberiya Hêzên Ewlekariya Hundirîn a Herêma Cizîrê Zozan Selman axivî û sersaxî ji malbata şehîd re xwest. Zozan Selman soz da ku rêya şehîdan û Rêber Abdullah Ocalan heta dawiyê bişopînin.

Xwişka şehîd Fatme Ebdullah axivî û got ew bi şehadeta birayên xwe Îsam û Ayaz serbilind e.

Dawiya merasîmê wesîqeya şehadeta şehîd hate xwendin û radestî malbatê hate kirin. Piştre girseya gel cenazeyê şehîd spart axê.