Endamê Hêzên Asayîşê Îsmaîl Selama dema bi erka xwe radibû li navçeya Eyn Îsa şehîd bû. Welatiyên Kantona Girê Spî bi beşdarbûna Hevserokê Rêveberiya Xweser a Minbicê Hemdan El-Ebid, rêveber û endamên saziyên sivîl û Rêveberiya Xweseriya Demokratîk, şervanên YPG-YPJ’ê û şervanên Hêzên Asayişê beşdarî merasîmê bûn.

Welatiyan cenazeyê şehîd Îsmaîl ji Nexweşxaneya Leşkerî ya Girê Spî wergirt û bi karwanekî wesayîtan ber bi Goristana Şehîd Mehmûd Tûmê ve ketin rê.

Li goristanê ji bo bîranîna şehîdên têkoşîna azadiyê deqîqeyek rêz hat girtin û ji aliyê şervanan ve merasîmeke leşkerî hate lidarxistin. Piştre Hevserokê Rêveberiya Xweser a Minbicê Hemdan El-Ebid, Endamê Saziya Malbatên Şehîdan Hesen Îbrahîm û Endama Kongreya Star  Dîlan Hesen axivîn.

Di axaftinan de sersaxî ji malbata şehîd re hate xwestin û hate diyar kirin ku şehîd ji bo azadî û ewlehiya gelê herêmê canê xwe feda dikin û li hember hemû êrîşên derve parastina aramiya herêmê dikin.

Piştre nasnameya şehadetê hate xwendin û radestî malbatê hate kirin. Welatiyan bi dirûşme û tilîliyan cenazeyê şehîd Îsmaîl li goristanê veşartin.