Bi hezaran şêniyên kantonên Qamişlo û Hesekê yên herêma Cizîrê beşdarî meşa  bi diruşmeya "Li dijî dagirkerî û xiyanetê meşê rûmetê" bûn.

Meş li bajarê Qamişlo ji bo şermezarkirina êrîşên dewleta Tirk a dagirker ên li ser Başûrê Kurdistanê, hevkariya PDK'ê ya bi dewleta Tirk re, her wiha ji bo piştevaniya berxwedana hêzên Tevgera Rizgariya Kurdsitanê ya li dijî êrişên dagirkeriyê hate destpêkirin.

Ji 23'yê Nîsanê ve dewleta Tirk a dagirker êrişên qirkirin û dagirkirinê li dijî herêmên Zap, Metîna û Avaşîn yên Herêmên Parastinê yên Medyayê pêk tîne. Li hemberî van êrîşan bertekên gel zêde dibin.

Di Meşa Rûmetê de, endamên Tevgera Mezopotamiya ya Çand û Hunerê bi cilê xwe yên folklorî, endamên Partiya Lîberal, endamên Partiya Yekitiya Suryan, Partiya Roj a Demokratîk li Sûriyê, Kongreya Star, Partiya Yekitiya Demokratîk , Partiya Sûriya Pêşerojê û saziyên civaka sivîl beşdar bûne.

Meş ji kolana sereke ya ber bi navçeya Amûd ve destpê kir û li tax û kolanên sereke yên bajarê Qamişlo didome. Di meşê de diruşmên silavkirina berxwedana gerîla tên berzkirin.

Her wiha alên HPG, YJA-Star, Kongreya Star, PYD'ê û wêneyên şehîdan û wêneyên Rêberê Gelê Kurd Abdullah Ocalan hatin hildan û pankartên "Li dijî dagirkerî û xiyanetê meşa rûmetê", "Bijî berxwedana gerîla", "Bê serok jiyan nabe" û "Gerîla pêşeroj û rûmeta Kurdistanê ye" hatin vekirine.

Meş ber bi Stada 12'ê Adarê ve diçe û li wir wê mîtîngeke were lidarxistin, xelkên ji dêrik, Rimêlan, Girkê Legê, Çilaxa, Tirbestpiyê û Hesekê tevlî dibin.