Endamê Desteya Rêveberiya Baroya Stenbolê Parêzer Firat Epozdemî di yekem rûniştina doza xwe de bi şertê darizandina bêragirtîbûn hate berdan. Epozdemîr piştî berdana ji Girtîgeha Marmarayê (Sîlîvrî) axivî û da zanîn ku ew ê ji bo serweriya hiqûqê têkoşîna xwe bidomîne.

Firat Epozdemîr li ber deriyê girtîgehê ji aliyê gelek hempîşeyên xwe ve bi çepik û kulîlkan hate pêşwazîkirin û li vir axaftineke kurt kir û diyar kir ku wî li girtîgehê qet morala xwe xirab nekiriye.

Epozdemîr destnîşan kir ku ew bi neheqî hatiye girtin û got ku ew ê bibe dengê bi hezaran girtiyên ku bi neheqî hatine girtin û ev yek anîn ziman: “Ji bo ku ev welat wesfa xwe ya dewlata hiqûqê biparêze û mafên mirovana xurt bibin ya ji destê me tê, em ê bikin. Em ê tim li hemberî girtinên bi neheqî li ber xwe bidin.”

Firat Epozdemîr di dawiya axaftina xwe de spasiyên xwe li hemû hempîşeyên xwe û raya giştî ya piştgirî daye, kirin û da zanîn ku divê hiqûq li ser siyasetê be û got: “Edalet ji bo me hemûyan heye, têkoşîn erka me hemûyan e.”