Bi deh hezaran welatiyên ji Bakur û Rojhilatê Sûriyeyê, îro ji bo pîrozkirina 1’ê Mijdarê Roja Kobanê ya Cîhanê li Kobanê hatin ba hev.

Bi deh hezaran kesên alên YPG û YPJ’ê bilind kirin, li Qada Jinê kom bûn û dest bi meşê kirin. Welatiyên heta Qada Şehîd Egîd meşiyan li vir êrîşên dewleta Tirk a dagirker a li ser Kobanê û Girê Spî şermezar kirin.

Piştre jî li Qada Şehîd Egîd 1’ê Mijdarê Roja Kobanê ya Cîhanê pîroz kirin.

 ‘LI DIJÎ ÊRÎŞAN EM AMADE NE’

Ji Fermandarên QSD’ê Heqî Kobanê axivî û destnîşan kir ku li dijî êrîşên li ser herêmê amade ne û bibîr xist ku êrîşên dewleta Tirk vîna gel dike hedef, lê bi ser nakeve.

Hevseroka MSD’Ê Emîne Umer jî got: “Li hemû kolanên vî bajarî mîna Arîn Mîrkan hemû şervanên YPG/YPJ’ê berxwedana efsanewî kirine. Kobanê bi ser ketiye û dijminê mirovahiyê têk çûye.”

‘DEWLETA TIRK ÊRÎŞÎ WELATIYÊN SIVÎL DIKE’

Umer bal kişand ku dewleta Tirk bi armanca destekdayîna çeteyên DAÎŞ’ê êrîşan dike û wiha dom kir: “Di roja Kobanê ya Cîhanê de artêşa Tirk êrîşî cihê bi ewle  û sivîlan dikin hedef.”

BANG LI HÊZÊN NAVNETEWEYÎ HATE KIRIN

Umer da xuyakirin Tirkiye bi şerê ku dike, zextên li ser DAÎŞ’ê kêm dike û divê hêzên navneteweyî li dijî êrîşan helwesteke zelal raber bike.

‘DIVÊ ERDOGAN Û TERORÎST BAŞ BIZANIN KU…’

Hevserokê Meclîsa Rêveber a Xwerêveberiya Xweser a Bakur û Rojhilatê Sûriyeyê Abdulhamîd El-Muhbaş jî ev peyam da:

“DAÎŞ a ku dihate gotin nayê şikandin li vir hate şikandin, têkçûna çeteyan a li Kobanê destpê kirî li Daêra Zorê dewam dike.

Erdogan û terorîstên ku destek dike bila baş bizanin ku, gelê herêmê wê li dijî hovîtiya wan li ber xwe bidin. Rejîma Tirkiye dixwaze zexta li ser DAÎŞ’ê kêm bike û bala QSD’ê ya li dijî terorîstan kêm bike, êrîşan dike.”

Piştî axaftinan koma di bin sêwana Navenda Çand û Huner a Baqî Xidir de cih digire derket ser dikê. Her wiha ji aliyê Navenda Şopdarê Rojê ve jî wêneyên berxwedana Bakurê Sûriye hate pîşandan.